編輯話我寫嘅花生料比玄學知識受歡迎，咁今期我繼續講多一啲奇怪嘅見聞啦，我發現見過唔少成功人物都會做一啲出人意表嘅事，循序漸進，由比較二打六嘅講起。

上期講過我係英國識左唔少損友，就講其中一個台灣嘅老友，呢個人就係我上期 所講好鍾意打老虎機其中一位，唔使講都知冇讀書啦，讀完中學之後就係英國渾渾噩噩左好多年，過住賭徒般既生活，話說有日佢當旺贏咗好多錢之後，突然間喺電視見有人將隻鷹放喺膊頭好有型，於是佢第日馬上搵人搭路，去黑市市場買左一隻鷹返嚟養，大佬，你身邊有冇聽過人會養鷹呀？以佢咁嘅性格，買咗當然唔會點樣 照顧佢啦，有日佢醒起好耐無餵鷹，於是去咗街市買野俾佢食，佢見到一包肉好平喎， 99P約＄10港紙，咁就買左餵佢食，跟住先至發覺點解隻鷹食完超級口渴，發哂癲甘拍翼，原來佢買果包係煙肉⋯呢條友做事亂甘來，但佢自然有佢生存方法，佢係台灣都做到渣林寶，應該令唔少人中左佢招。

 

我認識一位喺內地攪零售既富豪，佢可以算係我電話簿裏面頭最有錢嘅人之一，此富豪心地相當唔錯，聽到話要起間醫院，眉頭都唔鄒一下就捐咗八億出去，仲要匿名，佢有咩奇怪？只要每見一個人，佢都會大力向所有人推廣「深呼吸」，係帶住強迫症咁樣去sell呢種深呼吸健體法，當佢第一次同我講時，仲好似追龍甘吸氣然後話：「我今日深呼吸左8xx次」，我見佢手指有個唸佛器，就係用黎統計深呼吸次數，呢位老細傾生意幾句就傾完，最多都係講深呼吸，想當日我能夠同佢講左半個鐘風水，已經好榮幸，我再打量一下佢身邊既人，邊個手指有唸佛機，就知果條友係咩一回事，但手指有唸佛機既都撈得相當掂。

 

最後講嘅係一個香港冇人唔識嘅富豪，我認識一位曾經係佢身邊工作多年嘅前輩，但此富豪太猛我只可以講比較light既料，大家唔好以為有錢人一定會養尊處優，呢一位正正相反， 佢每日返工大部份時間都堅持行樓梯，唔係講緊幾層，佢棟大廈起碼十幾層以上先至係寫字樓，而且經歷咗一段好長嘅時間，因為該富豪都有功夫底子，行樓梯當晨操；有錢佬當然要請保鏢啦，但佢有一個獨特的面試方法，佢唔會理你係邊個介紹，係乜嘢冠軍，有咩金腰帶，你要做去保鑣首先要比佢打一鑊甘，仲要係突襲果隻，佢話連佢既拳都挨唔過，點樣保護佢？結果我呢位前輩朋友親眼見過好多黎面試嘅人比佢打到豬頭咁樣，但係工就見唔成，當然會俾錢佢睇醫生啦，呢d都只不過係碎料，因堅料太猛實在不能說。

 

為保私隱，唔開名及行業啦，但呢d特徽事跡只要你認識佢地身邊人，都一定會知道。但我想講既係，好多成功人物都真係有點出人意表，會做d萬中無一既野，如果你覺得自己未夠成功，可能你要加返d有性格既怪辟先。

 

source : http://www.winmoney.hk/famous/%e3%80%90%e5%a5%87%e9%96%80%e5%89%b5%e5%af%8c%e3%80%91%e4%bd%a0%e6%9c%aa%e6%88%90%e5%8a%9f%ef%bc%9f%e5%8f%af%e8%83%bd%e5%9b%a0%e7%82%ba%e4%bd%a0%e5%a4%aa%e6%ad%a3%e5%b8%b8%ef%bc%88%e9%9b%b2%e6%b8%85/