好耐都無同大家講過花生料，近日參與咗一個飯局，當中有一位閱人無數嘅X老闆相當之健談，該X老闆百足甘多爪，涉及業務正行至暗偏門都有，跟佢搵食嘅人無一千都有幾百。席間都是幾個麻甩佬，自然有講下女人，大家講起近幾年，好多model美女都去咗做保險，地產sales都撈得相當好，談及到top sales何以顏值高的美女為主話題，其他人都議論紛紛。

「大部分有錢的都是男人，反正要益中間人，當然搵個靚女買，可能傾到有售後服務呢，有大單簽自然有數。」A說的話有幾大嘅黃色偏見，覺得sell親嘅都係床單。

「咁靚女自然多有質素嘅人approach，唔好話一見到就買乜買物，有咁上下樣貌嘅，淨係夏天出海上隻靚船，落船都唔知被人抄幾多次牌啦，仲未計點樣獻殷勤，點幫佢，剩係埋到有錢人圈子已經易好多，一般普通人點埋去？」B講嘅呢番說話都不無道理，但都不及X老闆的精警。

「其實呢啲都係錯覺，真正長做長有嘅top sales並非你哋諗嘅美女，好多好正嘅女爆完幾次數，都未必可以每次持續，我請sales亦唔會特別睇重靚女。」

X老闆的背景實力雄厚，此話一出全部人收嗲，洗耳恭聽。

「依我經驗及觀察所得，最容易長期爆數嘅人，並非真係靚到dum一聲，就算靚女會爆數，並非真係個個都出賣色相，老實講邊有咁多不道德交易。我曾經請過幾個女top sales，都只係有幾分姿色，而且都係我朋友嘅老婆或女友，我亦唔會要求佢哋出賣色相，有少少秀色可餐就得，最大嘅食糊位，係佢要有一種麻煩嘅性格缺陷：強迫症。」

聽到呢個位，我暗自點頭認同。

「一個女人有無強迫症，只有佢身邊最親嘅人先知道，所以我從朋友口中自然可以知道，有強迫症嘅人，多數會想辦法令自己達成目標，或得到想要嘅嘢，所以想有數，佢哋同樣地會強迫自己到數。」

「而且最好係有家庭或經濟壓力，有點性格嗰隻，又唔願受氣，唔會是但搵人上岸，點都要靠自己先長做長有，我有幾隻開荒牛嘅sales就係呢個scenario，做到依家仲係度。」

「請最正嘅女做sales無用嘅，因為太多未知數，爆幾下數之後，可能三分鐘熱度，可能搵到碼頭上岸，可能黐線跳制唔做，可能突然有錢要享受人生，可能隻狗死咗無心機，總之會突然消失嘅可能性大好多。」

話到此處，可以見到X老闆對住A&B，根本係唔同嘅層次。