最近又處理咗好幾個婚姻麻煩的case，真的令人相當感概，今期不如討論下男人的秘密後宮，其實男人到底可以有幾賤，唔係自命清高，如果賤到男人都覺得佢賤的話，呢種人都賤得相當標青。

十九幾年前有一個很平凡的男人，日間係貿易行做業務員，為幫補家計照顧年邁體弱的兩老，晚上當part-time保安，居然因為咁樣引起單身老闆娘注意及好感，水鬼升城隍，入了公司做黃馬褂，秘密拍拖再結婚再分埋股份，無咩本事但卻位高權重，不知情者睇仲以為佢好勁，但所有事情都是他老婆處理的，他只是咬老軟，掛住個director喺外面招搖過市。

最近一年夫妻反目成仇，因為軟飯男係公司唔掂時仲買車買樓畀小三，而且有龐大後宮集團，一共收埋4個女人，仲有幾個私生子，最賤係聯合公司股東賣埋公司股份畀敵對公司，使女人錢再玩到咁串，簡直人面獸心。

但其實男人有幾個老婆，都並非真的都是賤人，我認識有一位隱形富豪，四十多五十歲，白手興家，自己有私人飛機，一百幾十億身家少不了，自然老婆都有三個，大中小全齊，最大個仔讀大學，最細嘅女讀幼稚園。雖然此富豪同樣花心，但卻有品得多，因為佢每個人都有照顧得到，正常男人玩法，最好大婆及二奶天各一方一個喺美國，一個喺雲南咁樣會煩少好多野，但此人偏偏相反，佢每去一個地方，都會盡量安排三個老婆去晒，仲要分開接載，去北京時同大婆飛，然後空機回香港，再接老婆中號及小號，佢話咁樣先至一家人齊齊整整，所以三個老婆都知道各人存在，亦算能夠和平共存，而剛剛過完既暑假，其實係佢最忙嘅時候。

兩個人都有幾個老婆，但兩人實在差太遠了。

有一位女性朋友跟我說，好似呢類有錢有品嘅男人，其實真係應該搵幾個老婆，因為佢真係可以畀到一個good life人哋，因為見得太多婚姻慘劇，其實我真係幾認同的這種有品alpha male的。最近教奇門遁甲，同學生講到有桃花嘅時候，其實係同時有一個吉星係命宮，好多同學都唔明白，有第三者點解會係吉星？只是今天社會變了，行了一夫一妻制，以前的社會，能夠妻妾成群，兒孫滿堂開支散葉才是好事，代表你有福氣有本事。