已經好耐冇同大家講花生料，今期同大家講下女人，講下好多港男都鍾意溝嘅台灣妹。

早前台灣朋友來港，介紹咗一個朋友A先生開盤看奇門命理，對方最關心嘅係姻緣問題，其實我都覺得有啲奇怪，A先生都算一表人才，自己做生意，家境唔錯，雖然佢直認自己要求頗高，但A先生喺台灣都算係中產筍盤，而且台灣選擇多點解仲會媾唔到女？

為了台妹，香港人都鍾意去台灣夜蒲，專登買機票酒店去台灣過一個weekend嘅大有人在，論夜生活，其實台灣不論軟件硬件性價比都比香港出色得多，地方大，氣氛好，買枱開酒價錢平香港差唔多40%，台妹亦相對熱情嬌嗲，樣貌身材都比一般港女吸引，好難想像條件不俗的A先生居然會係單身。

「你們香港人去台灣clubbing把妹玩玩是可以，但如果你愛美女，認真的選擇其實不多，小心會把到酒店妹。」

酒店妹，即係台灣係香港做陪坐嘅夜總會小姐，有啲只係賣藝不賣身，但係賣身嘅都大有人在。無辦法，台灣薪水水平比較低，大學畢業嘅都係搵到4萬蚊新台幣都已經算好好，係企業返工嘅管理層有八萬蚊新台幣（即兩萬港幣）已經算唔錯，肯拋個身出嚟做陪坐，好快就搵到十幾廿萬新台幣嘅月薪，比企業高層更高人工。所以好多出身普通嘅靚女，都難以抗拒金錢引誘，會做呢類型嘅工作或者part time炒下散，亦因為台灣地方多，家鄉係宜蘭，可以去新竹嗰邊返工，換個名就係一種新生活。有好多唔係酒店妹，但都曾經被包養過，當地圈子好易傳開去，要搵好女仔又靚女嘅並不容易。

A先生想當年入世未深，同個女仔行咗一段日子之後先至發覺對方做過酒店妹，但係撻着咗，不能自拔，件事又冚唔住，係親友之間揚咗開去，最終敵不過壓力慘淡分手收場。想搵個正正經經，好條件又靚靚地嘅女仔，都會搵一啲小康之家出身，但係相對地呢啲女仔眼角亦特別高，A先生又唔夠人爭，所以成為咗夾心階層，一直都搵唔到適合嘅對象。

其實好多地方都有一樣情況，只不過係情況有幾普遍而已，只要一個地方經濟差，需要或者想搵快錢嘅人及行業就應運而生，今時今日香港人去台灣媾女依然吃香，其實背後有可能係距離及背景嘅陌生差異，難以被起底，所以係香港玩到臭咗朵嘅玩家，都喜歡著草去台灣再玩，如果可以玩到係台灣都臭埋，果位就係真player啦。

 

source: http://www.winmoney.hk/famous/%e3%80%90%e5%a5%87%e9%96%80%e5%89%b5%e5%af%8c%e3%80%91%e5%8f%b0%e5%a6%b9%e9%99%b7%e9%98%b1%ef%bc%88%e9%9b%b2%e6%b8%85%e5%ad%90%ef%bc%89%ef%bc%88%e7%ac%ac99%e6%9c%9f%ef%bc%89/