作為一個命理風水師,經常都會遇到很多奇怪的客人及案子,某些人都expect風水師有另外一個function,志不在命理運氣,最近見返一個朋友,醒起佢介紹過一個長輩我認識,接過一個令我幾難做嘅case。

該長輩約6-70歲,是某一老行尊聲望隆厚,信風水嘅一早有搵師傅啦,何以突然間托朋友請我看,我都好奇怪,去到佢屋企,叫我幫佢個女開個盤,我開始覺得佢係想我幫佢教女,不出所料,睇睇下屋佢拉咗我入房,想我在盤中表達她想給女兒的意見,佢覺得我年輕,同佢個女有偈傾。

呢種類似嘅情況其實發生過好幾次,令我覺得相當難做,奇門遁甲是我搵食的專業,唔係傳聲筒,我只能表達我在盤中見到嘅信息,但總有些怪人希望我講佢想講嘅,無中生有,講又違背專業,唔講又得失咗個大佬,但遇上呢種情況,我多數選擇後者,最尾我妥協嘅只有叫佢個女努力工作,及染返黑個頭,他女兒愛吃洋腸,但sorry此點乃個人喜好,我都唔知點勸。

另外好多案子都想借風水師把口,去某一個人施壓,可能係自己老公,可能係自己阿哥,雖然大部分都出於好意,但請明白任何命理師傅都不應該說出盤中反方向的事情,唔好令我哋難做了。

其實,睇下睇下我覺得風水最亂的是大的保險、基金公司、ibank等等。好簡單,因為好多人都各自為政,自己搵師傅擺自己嘢。

假設公司的大老闆都有睇風水,擺好個陣set好個大局,但好多員工都係自己個位度放風水,保守假設一間公司有300個位,但起碼可能有30個陣,玄空飛星、八宅、奇門六壬法科全部都應該有齊,點亂?公司一個主方位艮卦可能有齊石春、關公、陶馬、紫晶洞、富貴竹、石春及音樂盒等等各種不同屬性嘅風水物,仲唔係七國咁亂?邊個有效仲要睇下邊個好彩搵啱師傅幫到手,邊個唔好彩請錯人。某一新年我試過去幫個做嘅ibank朋友擺一擺,同一個小時裡面應該有三個人帶師傅上去,大公司風水有幾亂,大家可想而知,但公司又好難用另一種方法令員工安心及爆數,員工個位放咩唔通老闆都要理埋?

我曾接過一個inquiry,話說某投行有一忽位,邊條team坐落去,無幾耐就成team人炒哂,無人肯坐,想我去睇下發生咩事,擺返好佢,否則嘥咗忽位,白交租無人肯坐,所以話大公司風水,其實真係相當亂的。