今時今日世界難撈，各個階層都充滿競爭，個個都想趁勢搵錢，但埋頭苦幹既同時，好多人都忽略左另一種財富，無管理好呢種財富，搵多多都唔夠蝕，分分鐘令你嘔突，呢種財富叫做-「教仔」，i我以玄學家呢種第三身既身份，接觸過唔少富貴子弟既敗家case，教唔好下一代，你搵多多都唔夠蝕。

1）有一個做實業既client，唔係咩上市公司主席但身家幾厚，有好幾個高貴地段物業在手，香港外地都有，但得一粒仔，擺明自細縱到暈果隻，10零歲就放洋流學，讀書唔成，日日爛蒲溝女，未夠秤就落club爆香檳，幾次飲醉酒掃左人地果場打爛哂d野，累積寄錢賠償金額貼近百萬；後來老豆制水就開始玩平d，唔落club爆樽改行玩cocaine，仲識串佢老豆話你cut左我張credit card，我就攞張廢card去coke…老豆頭痛都不得了，問我掉佢去軍校寄宿重頭再來好唔好，我贊成呢個係好建議，但應該要去一個風氣更嚴厲既地方軍校更有效果，如中國或新加坡，呢個case條細路仲細，仲有彎轉。

 

2）唔好以為敗家係仔既專利，女其實可以更high high，曾有一位客人說起他的哥哥，為一集團主席，尚算有錢而行頭有名有面，但絕非唔憂做之流，又係衰在太錫家中千金，自細要咩有咩，又愛威愛比較，個女係shopaholic全身名牌，結果大學畢業時老豆前後找左一兩球卡數⋯，畢業後個女自力更生搬出去住，以為改好啦，但點知幾年後，一日又突然有人上門收數，呢次唔只卡數甘簡單，仲借左財仔同涉及詐騙，條數大到會令佢蒸發三分一身家，當中仲辣著江湖大佬，想破產甩身都無用，被江湖人找到公司上門，影響埋老豆董事會地位⋯

 

3）呢個故事簡而清，但相當汗顏，曾經有客人問我一個相當難答既問題，見我前的兩個月，佢俾人斬但好彩有差人經過令佢只受輕傷，佢係正經人家做正行生意，面面俱圓絕冇仇家，佢好懷疑係佢個PK阿哥買凶，因為有米老豆病危，懷疑佢想分埋佢份身家⋯此題極其難答亦極其無情，敗家X除左破財更可令你死唔眼閉⋯

 

呢期興講cult爆既「贏在射精前」，多舊魚，而家香港充斥著怪獸家長，教好個小朋友唔一定係迫佢學你認為有用既野，但俾個健康正常既童年佢，從小灌輸自食其力既概念，其實係幫你晚年投資緊。