做我地呢行，旁人眼中以為係一種好輕鬆既職業，同人傾幾句，揸住個羅庚行個圈就收錢，男人仲可以容易溝女，其實於我而言事實剛好相反。

話說上星期日去游船河，船上面有三分二既人係唔識既，我每次去到呢d環境都會保持低調，因為好怕係朋友突然間介紹，「我呢個朋友睇風水算命架！」跟著十有八九都係新朋友接住話：「下？唔似喔！你睇咩架？」「我用既係奇門遁甲⋯係唔需要時辰八字起局既⋯⋯下刪300字。」十幾年黎呢段說話真係講左無一千都有八百次，但其實人地好奇唔知咩係奇門遁甲，解釋下我係好樂意的，但最怕係連名都唔知既人走黎要求我「贈兩句」。

當日玩到後來有朋友駛左隻船過來，兩架船泊埋一齊玩，無端端隔離船有兩個唔識嘅女仔叫我，話呢聽講你睇相架喎可唔可以你傾吓計呀？我就話今日飲左好多酒怕講唔準，有禮地合十sorry話下次先啦！點知換來一塊蟹麵。

其實放低個羅庚我都係個年輕人，師傅都要減壓架⋯星期日難得唔駛開工，仲要不嬲都係夜訓，我犧牲左我瞓覺嘅時間，晨早仆去隻船度諗住游下水飲下酒，你仲會唔會想開工呢？仲要打大赤肋同你傾，兩粒蓮頭都蝕埋，條數唔係甘計喎老細。

大家試想下如果你係一個律師，飲飲下酒有個唔識既人隊疊文件出黎叫你贈兩句，你會點？仲要好多時贈兩句係酒吧發生，周圍環境都好嘈，嗌破喉嚨你都聽唔到我講乜，有時飲大左對方仲要唔記得埋，講完都嘥X氣。

好多人覺得講兩句無成本，駛死咩？但每個師傅走得出來掛牌，都下過一段苦功，學成絕技既時間學費加埋分分鐘多過你讀個master/phd，如果個位師傅有修正規道法，每月既初一十五仲要花唔少時間修煉，風雨不改，好似我自已甘，睇左成千上萬既個命例，教既學生亦都數以百計，真係睇到嘔架啦，想交朋友既不如啍下杯算啦！

如果真係想搵人贈兩句，其實最好搵剛剛學成既人，佢會因為好奇心同想累積經驗而好有心機幫你睇，想當年我都係甘樣磨練成今日的我，但在職既師傅肯贈你既係人情，唔講就真係道理，因為玄學家既工作量同壓力其實都很大的，一般人難以明白。

為左化解呢種矛盾，其實我既app/網站有一個功能叫《雲清面相教學》，佢係具備記錄功能的相學書，更可以輸出報告，熟讀此程式後，只需要15分鐘便可完成面相報告，求人不如求己，玩得多你自己都識觀相知人。